Тинејџерите ќе имаат дневен лимит од два часа, а Meta ги повика TikTok и YouTube да воведат слични ограничувања
Meta денеска соопшти дека ќе воведе големи промени во функциите за заштита на децата на Facebook и Instagram, како дел од спогодбата со речиси сите сојузни држави во САД.
Еве што ќе се промени за корисниците помлади од 18 години на Instagram и Facebook доколку спогодбата биде одобрена:
- Ограничување на времето – Тинејџерите ќе имаат дневно ограничување од два часа на Facebook и Instagram, но родителите ќе можат да го надминат. Вкупното ограничување од два часа се однесува на двете апликации заедно.
- Ноќен режим – Корисниците нема да можат да објавуваат или да гледаат содржини од полноќ до 6 часот наутро.
- Школски режим – Известувањата ќе бидат исклучени од 8 до 15 часот.
- Потсетници – Апликациите ќе испраќаат потсетници по секои 15 минути непрекинато користење. Потсетници ќе има и кога дневното користење ќе достигне 60 и 90 минути.
- Контрола на содржината во Feed – Тинејџерите ќе можат да изберат feed без алгоритам, во кој нема персонализација преку системите за препораки на Instagram и Facebook. Родителите ќе можат да го задолжат ова поставување.
- Контрола на автоматското пуштање – Тинејџерите ќе можат да го исклучат автоматското пуштање на видеата. Родителите ќе можат да го наметнат ова поставување.
- Скриени лајкови – Тинејџерите стандардно нема да ги гледаат бројот на лајкови и реакциите на објавите.
- Филтри – Филтрите за естетски операции и екстремна шминка нема да им бидат достапни на тинејџерите.
- Потврда на возраста – Meta планира да ги зајакне алатките што ги користи за откривање профили на корисници помлади од 13 години, како и профили на тинејџери од 13 до 17 години, со цел да се осигури дека тие имаат „искуства дизајнирани за тинејџери“.
- Родителски контроли – Meta ќе додаде нови контроли за родителите, кои ќе добиваат известување ако тинејџер поврзе втор профил или стапи во интеракција со сомнителни профили. Родителите периодично ќе добиваат и информации за користењето на платформите од страна на тинејџерите.
- Директни пораки – Директните пораки нема да бидат опфатени со ограничувањето на времето, ноќниот режим и школскиот режим.
Meta исто така ќе им плати на сојузните држави околу 18 милијарди долари за финансирање иницијативи за безбедност на младите на интернет. Сумата е значително помала од нето добивката на компанијата од 60,5 милијарди долари во 2025 година. Исплатата ќе биде распоредена во период од 10 години, а Meta ќе задржи 5,3 милијарди долари доколку TikTok и YouTube не воведат слични мерки. Доколку го направат тоа, Meta вели дека ќе го намали дневното ограничување од вкупно два часа за двете апликации на еден час за секоја апликација, а ноќниот режим ќе биде продолжен од 22 до 7 часот.
Meta сака YouTube и TikTok да воведат едночасовно дневно ограничување, ноќен режим и мерки за потврда на возраста, како и секоја од компаниите да плати по 5,3 милијарди долари, колку што Meta ќе задржи во рамките на спогодбата. Meta објави и отворено писмо со кое ги повикува TikTok и YouTube да ги воведат истите мерки.
Тинејџерите кои ќе имаат ограничувања на Instagram и Facebook би можеле едноставно да се префрлат на TikTok и YouTube, па Meta очигледно не сака да биде единствената компанија што ќе изгуби приходи поради ваквите ограничувања.
Meta досега беше вклучена во федерален судски процес поврзан со тужбата, а доколку процесот продолжеше, компанијата можеше да биде принудена да плати уште поголема сума. Според Reuters, Калифорнија, Колорадо, Кентаки и Њу Џерси барале речиси 200 милијарди долари граѓански казни.
Спогодбата беше постигната пред извршниот директор на Meta, Марк Закерберг, да треба да сведочи пред судот. Сепак, Флорида одби да се приклучи на спогодбата и ќе продолжи со судскиот процес. Ново Мексико исто така не е дел од спогодбата, бидејќи претходно годинава ја доби сопствената судска постапка против Meta.
