Smart Privacy Display треба да спречи луѓето од страна да ја гледаат содржината на новите премиум телефони на Xiaomi, слично како што тоа го прави Samsung кај Galaxy S26 Ultra
Компанијата Xiaomi би можела на своите претстојни флегшип телефони да претстави сопствена верзија на екран за заштита на приватноста, слична на решението што Samsung годинава го воведе кај Galaxy S26 Ultra. Во пресрет на претставувањето на новите модели, кое се очекува во септември, сега протекоа снимки од интерфејсот кои откриваат како ќе функционира оваа функција.
Станува збор за функцијата наречена Smart Privacy Display, а снимките наводно потекнуваат од глобалната верзија на софтверот на Xiaomi. Според нив, корисниците ќе можат детално да го приспособат начинот на кој екранот ќе ја штити содржината од погледите на луѓето кои се наоѓаат од страна.
Поконкретно, корисниците ќе можат да креираат посебни групи и во нив да додаваат различни апликации, а за секоја група да ги одредат поставките за заштита на приватноста. Така, на пример, одредени апликации би можеле постојано да го користат овој приватен режим, додека кај други екранот би функционирал вообичаено.
Исто така, ќе постои можност за автоматско активирање на заштитата при прикажување чувствителна содржина, како што е внесување лозинки, користење банкарски апликации и слично.
Smart Privacy Display се очекува да го добијат Xiaomi 18 Pro и Xiaomi 18 Pro Max, додека основниот Xiaomi 18 би останал без оваа функција.
