Samsung Galaxy Z Fold8 Ultra го носи Fold концептот на ново ниво со Ultra перформанси, напредни камери, поголем дисплеј и серија смислени подобрувања, без да ја менува препознатливата формула на серијата.
Текст и фото: НИКОЛА БУРАГЕВ
Откако Samsung Galaxy Z Fold8 ни приреди прилично позитивно изненадување и остави одличен впечаток, ред е да видиме што може најмоќниот Galaxy Z Fold8 Ultra. За да ги унифицира своите серии и недвосмислено да покаже дека станува збор за најдобриот модел во својата серија, Samsung од оваа сезона на името Galaxy Z Fold8 му ја додава ознаката Ultra.
Сè што ознаката Ultra претставува во S серијата, сега е Ultra и во Z серијата. Во таа насока, сакал некој да го признае или не, односно да го забележи или не – Galaxy Z Fold8 Ultra навистина носи смислени подобрувања во серијата на преклопни телефони.
Најдоброто од сè е што цената е речиси непроменета во однос на минатата година, па останува да видиме како корисниците ќе реагираат на сè што Samsung го спакува во овој модел.
Што се однесува до нас, периодот поминат со овој телефон јасно покажа каде се наоѓа Ultra денес, особено во споредба со претходните искуства, бидејќи со години сме корисници на Z Fold серијата.
Дизајн и искуство
Samsung не експериментираше ниту малку кога станува збор за изгледот и дизајнот. Освен новите бои, телефонот е речиси целосно идентичен со својот претходник. Дури нема ни да забележите дека профилот во отворена состојба е намален од 4,2 на 4,1 милиметар – а реално, како би можеле да го забележите тоа, нели?!
Samsung тврди дека унифицирањето на дизајнот е еден од столбовите врз кои се темели оваа серија – идејата е без размислување да знаеме дека станува збор за Z Fold серијата. И морам да признаам дека навистина е така. Во рака, телефонот остава впечаток на навистина бескомпромисно квалитетна изработка, а истовремено е и многу пријатен за користење.
Внатрешноста крие нова шарка, изработена од два слоја титаниум. Ultra Thin Glass и понатаму се наоѓа на врвот, над него е заштитната фолија, но под нив има флексибилен титаниумски слој. Основата ја сочинува уште една титаниумска плоча, која во средината е перфорирана. На овој начин се обезбедува потребната флексибилност, но и се задржува издржливоста на целиот дисплеј.
Кога телефонот ќе се отвори, се открива сè уште видливата бразда на средината на екранот. Таа е помала во однос на претходната генерација, но сепак не исчезна целосно. Благодарение на одличниот нов антирефлексен слој, многу поретко ќе мора да го барате аголот под кој браздата нема да биде видлива. Ова можам да го потврдам и по неколкунеделното користење на телефонот, при што практично немав никакви проблеми во тој поглед. Покрај тоа, екранот може да се постави во речиси која било положба, онака како што вам ви одговара. Под агол од 90 степени, екранот нема самостојно да се отвори, што може да биде многу корисно во одредени ситуации. Од Samsung велат дека ова е постигнато благодарение на нешто поинаквата шарка во однос на passport моделот, која е конструирана и изработена на малку поинаков начин.
Дисплеи
Токму дисплеите се една од најголемите причини поради кои Fold8 Ultra е интересен. Надворешниот екран е 6,5-инчен Dynamic AMOLED 2X со резолуција од 2520 x 1080 пиксели и адаптивно освежување од 1 до 120Hz. Кога уредот ќе се отвори, добивате огромен 8-инчен Dynamic AMOLED 2X дисплеј со резолуција од 2504 x 2256 пиксели, исто така со адаптивни 1-120Hz.
Главниот екран достигнува до 3.000 нити осветленост, а Samsung дополнително го подобрил антирефлексниот слој. Резултатот е одлична читливост и надвор од домот, што е особено важно кај голем дисплеј кој лесно може да фаќа одблесоци.
Но вистинската вредност на 8-инчниот екран се гледа при продуктивност. Multi Window овозможува паралелно работење со повеќе апликации, а големата површина е одлична за читање документи, прегледување веб-страници, обработка на фотографии, гледање видео и работа со повеќе информации истовремено.
Преклопот и понатаму е присутен, но е помалку забележлив од порано. При директно гледање во екранот, тој релативно лесно се игнорира, иако при одредени агли или допир сè уште може да се почувствува. Тоа останува еден од компромисите на технологијата на преклопни дисплеи.
Перформанси
Galaxy Z Fold8 Ultra е опремен со Snapdragon 8 Elite Gen 5 for Galaxy, специјално оптимизиран за Galaxy уредите. Samsung наведува подобрување од 16% кај CPU перформансите, 15% кај GPU и 21% кај NPU во однос на Galaxy Z Fold7.
При секојдневна употреба, тоа значи исклучително брз уред кој без проблем се справува со мултитаскинг, обработка на фотографии и видео, гејминг и напредни AI функции. Но, кај Fold8 Ultra перформансите имаат уште поголемо значење поради самиот формат. Ова е телефон кој е направен да се користи со повеќе апликации истовремено. Може да имате отворен веб-прелистувач, пораки и видео или документ во исто време, а One UI овозможува релативно лесно организирање на целиот работен простор.
Samsung дополнително ја подобри и термалната архитектура со проширена графитна структура за ладење, што треба да помогне при долготрајни оптоварувања. Тоа е особено важно за гејминг и за задачи кои долго време го оптоваруваат процесорот, бидејќи кај преклопен уред со толку тенка конструкција управувањето со топлината е сериозен инженерски предизвик.
Камери
Камерите се една од најголемите причини поради кои Fold8 Ultra го носи името Ultra. Главната камера е 200 MP со f/1.7 отвор, а ја дополнуваат 50 MP ултраширока камера со f/1.9 и 10 MP телефото камера со f/2.4 и 3x оптички зум. Системот поддржува и снимање видео во 8K резолуција.
Главниот 200 MP сензор е особено интересен во услови со добро осветлување, каде што може да произведе фотографии со многу високо ниво на детали. Samsung дополнително овозможува HDR и во 200 MP режимот, што помага при сцени со силен контраст. При секојдневно фотографирање, сепак, камерата најчесто користи комбинирање на пиксели за да произведе фотографии со подобар баланс меѓу детали, шум и динамички опсег.
Ноќното фотографирање е дополнително подобрено преку ProVisual Engine, кој работи на препознавање на сцената и оптимизација на експозицијата, детали и боја. Samsung особено го нагласува подобрувањето при слаба осветленост. Ултрашироката камера од 50 MP носи значително поголема резолуција и е корисна не само за широки пејзажи и архитектура, туку и за макро фотографии. Ова му дава на Fold8 Ultra поголема флексибилност при фотографирање.
Телефото камерата нуди 3x оптички зум, што е практично за портрети и далечни објекти. Сепак, токму телефото камерата е една од точките каде што дел од рецензиите забележуваат дека Samsung има простор за дополнително подобрување, особено во споредба со некои конкуренти со подолг оптички зум.
Интересни се и функциите за видео, меѓу кои Dual Recording и My FanCam, која автоматски го следи избраниот субјект и го прекадрира кадарот. Овие функции особено можат да бидат корисни за креатори на содржина.
Батерија и полнење
Една од најзначајните хардверски промени е зголемувањето на батеријата на 5.000 mAh. Samsung користи силикон-јаглеродна технологија за батеријата, што овозможува поголем капацитет без значително зголемување на дебелината на уредот.
Компанијата наведува до 27 часа репродукција на видео, што е подобрување во однос на претходната генерација. Во реална употреба, автономијата е една од силните страни на Fold8 Ultra. Со оглед на тоа што имаме огромен внатрешен екран, батеријата мора да поднесе значително оптоварување, а комбинацијата од новиот процесор и поголемиот капацитет овозможува уредот да издржи цел ден интензивно користење, а при поумерено користење и значително повеќе.
Полнењето е со 45W преку кабел, а поддржано е и безжично полнење. Samsung повторно не се натпреварува со производителите кои нудат 100W или 120W полнење, но 45W е важен чекор напред за Fold серијата.
Софтвер
Galaxy Z Fold8 Ultra пристигнува со Android 17 и One UI 9, а токму софтверот е она што му овозможува на огромниот дисплеј да стане вистинска продуктивна алатка, наместо само поголем екран.
Multi Window поддржува работа со три апликации во split-screen режим, а дополнително може да се користат и повеќе пловечки прозорци. Ова го прави Fold8 Ultra исклучително практичен за работа со повеќе задачи истовремено.
Galaxy AI е уште подлабоко интегриран во корисничкото искуство. Samsung се обидува AI функциите да не бидат само дополнителни алатки, туку дел од секојдневниот начин на користење на уредот.
Една од интересните функции е Now Nudge, која врз основа на контекстот предлага следни чекори и активности низ поддржаните апликации. Големиот дисплеј дополнително го прави користењето на AI функциите попрактично – имате повеќе простор за преглед на резултатите, уредување содржина и паралелно користење други апликации.
Samsung ветува и долгорочна софтверска поддршка, што е особено важно кај уред со ваква цена и премиум позиционирање.
Финален впечаток
Galaxy Z Fold8 Ultra е најамбициозниот преклопен смартфон што Samsung досега го направил.
Неговата најголема сила е тоа што успева да спои огромен 8-инчен дисплеј, моќен хардвер, напреден камера систем, поголема батерија и сериозни AI и продуктивни функции во конструкција која е потенка и полесна од она што би се очекувало од ваков уред.
Најголемиот чекор напред се гледа во батеријата, камерите, дисплеите и перформансите, додека новата шарка и потенкото тело го прават Fold8 Ultra многу попрактичен за секојдневно носење.
Секако, компромисите сè уште постојат. Цената останува исклучително висока, телефото камерата не е на исто ниво со најдобрите системи со подолг оптички зум, а преклопниот дисплеј и понатаму бара поголемо внимание од класичен смартфон. Но тоа се компромиси кои доаѓаат со самиот концепт на уредот.
Она што Samsung го направи со Galaxy Z Fold8 Ultra е повеќе од обична надградба на Fold серијата. Компанијата го зема познатиот концепт и го подигна на Ultra ниво – со поголем работен простор, посериозни камери и перформанси кои можат да го претворат телефонот во вистинска мобилна работна станица.
Galaxy Z Fold8 Ultra не е смартфон кој се обидува да биде како сите други. Тој е уред за корисници кои сакаат телефонот да може да се претвори во нешто многу повеќе кога ќе им затреба.
Оценка: ⭐⭐⭐⭐⭐ (5/5)
ТЕХНИЧКИ СПЕЦИФИКАЦИИ
Galaxy Z Fold8 Ultra |
||
| Екран | Главен екран | 8 инчи* QXGA+* Динамичен AMOLED 2X Екран (2.504 x 2.256), 422 ppi 120Hz адаптивна стапка на освежување (1~120Hz) Vision booster |
| *Измерено дијагонално, големината на главниот екран на Galaxy Z Fold8 Ultra е 8,0 инчи како целосен правоаголник и 8,0 инчи без заоблените агли; реалната површина за гледање е помала заради заоблените агли и отворот за камерата. | ||
| Надворешен екран | 6,5 инчи* FHD+* Динамичен AMOLED 2X Екран (1.080 x 2.220), 422 ppi 120Hz адаптивна стапка на освежување (1~120Hz) Vision booster |
|
| *Измерено дијагонално, големината на надворешниот екран на Galaxy Z Fold8 Ultra е 6,5 инчи како целосен правоаголник и 6,5 инчи без заоблените агли; реалната површина за гледање е помала заради заоблените агли и отворот за камерата. | ||
| Димензии и Тежина | Преклопен | 72,8 x 158,4 x 8,9mm |
| Отворен | 143,2 x 158,4 x 4,1mm | |
| * Дебелината на Galaxy Z Fold8 Ultra кога е отворен не ја вклучува рамката на Главниот екран. | ||
| Тежина | 215 gr | |
| Камера | Надворешна камера | 10MP Селфи камераF2.2, Големина на пиксел: 1.12μm, FOV: 85˚ |
| Главна камера | 10MP Главна камераF2.2, Големина на пиксел: 1.12μm, FOV: 100˚ | |
| Задна тројна камера | 200MP Широко-аголна камераQuad Pixel AF, OIS, F1.7, Големина на пиксел: 0.6μm, FOV: 85˚,
2X зум со оптички квалитет |
|
| 50MP Ултра широка камераQuad Pixel AF, F1.9, Големина на пиксел: 0.7μm, FOV: 120˚ | ||
| 10MP Теле-фото камераPDAF, OIS, F2.4, Големина на пиксел: 1.0μm, FOV: 36˚, 3X оптички зум | ||
| AP | Snapdragon® 8 Elite Gen 5 за Galaxy | |
| *Snapdragon е производ на Qualcomm Technologies, Inc. и/или нејзините подружници. Snapdragon е заштитен знак или регистриран заштитен знак на Qualcomm Incorporated. | ||
| Меморија и простор за складирање | 16GB меморија со интерен простор за складирање од 1TB 12GB меморија со интерен простор за складирање од 512GB 12GB меморија со интерен простор за складирање од 256GB |
|
| *Достапноста може да варира во зависност од регионот и продажниот канал. Опциите за простор за складирање и достапноста може да варираат во зависност од добавувачот, земјата и регионот. | ||
| Батерија
|
5.000 mAh (типична) двојна батерија | |
| *Типична вредност тестирана во лабораториски услови од трета страна. Типичната вредност е естимирана просечна вредност имајќи ја предвид девијацијата во батерискиот капацитет помеѓу примероците батерии тестирани под стандардот IEC 61960. Оценетиот капацитет е 4,854mAh за Galaxy Z Fold8 Ultra. Реалниот век на батеријата може да варира во зависност од мрежната средина, корисничките навики и други фактори. | ||
| Полнење* | Полнење со кабел *: До 75% наполнета батерија за 30 минути со адаптер од 60W**Супер брзо безжично полнење***
Wireless PowerShare**** |
|
| *Полнење со кабел компатибилно со QC2.0 и AFC. Резултати од интерни лабораториски тестови на Samsung, спроведени со 45W адаптер за патување додека уредот има преостанати 0% батерија, со сите услуги, карактеристики и екран исклучени. Реалното време на полнење може да варира во зависност од реалното користење, условите на полнење и други фактори. **Адаптерот за полнење од 45W се продава засебно. Употребувајте само кабли и полначи одобрени од Samsung. ***Безжично полнење компатибилно со WPC. **** Wireless PowerShare е ограничено на Samsung или други брендови паметни телефони со WPC Qi безжично полнење. Може да не функционира со одредени додатоци, навлаки, уреди од други брендови. Може да влијае на примање на повик или услуги со проток на податоци, во зависност од мрежната средина. |
||
| Отпорност на вода | IP48 | |
| *На основа на лабораториски тест услови за потопување во до 1,5 метри свежа вода до 30 минути. Не се препорачува за употреба на плажа или во базен. Исплакнете ги остатоците и исушете ако е влажно. Водоотпорноста на уредот не е трајна и со текот на времето може да се намали поради нормалното абење и трошење. | ||
| Оперативен систем (OS) | Android 17 One UI 9 |
|
| Мрежа и поврзаност | 5G*, LTE**, Wi-Fi 7***, Bluetooth® v 6.0 | |
| *Потребна е оптимална 5G мрежна поврзаност, достапна на одредени пазари. Проверете со продажниот партнер за достапност и детали. Брзините за симнување и стриминг може да варираат во зависност од провајдерот на содржини, поврзаноста на серверот и други фактори. **Достапноста на LTE модел варира во зависност од пазарот и продажниот партнер. Реалната брзина може да варира во зависност од пазарот, операторот и корисничката средина. ***Wi-Fi мрежната достапност може да варира во зависност од пазарот, мрежниот провајдер и корисничката средина. Потребна е оптимална конекција. Потребен е Wi-Fi 7 рутер. |
||
| Бои | Графитна, Крем, Виолетова сенка* | |
| *Достапноста на боите може да варира во зависност од пазарот, регионот или продажниот партнер. | ||
ВИДЕО РЕЦЕНЗИЈА: Samsung Galaxy Z Fold8, Fold8 Ultra и Flip8 ексклузивно на Конект.мк
