iOS 27 ќе биде достапен за поддржаните iPhone уреди уште на 14 септември, додека на новите iPhone 18 Pro и 18 Pro Max ќе биде претходно инсталиран. Корисниците во ЕУ, сепак, засега остануваат без Siri AI.
Apple при претставувањето на новите iPhone 18 Pro и 18 Pro Max го откри и датумот на објавување на стабилната верзија на iOS 27. Новата верзија на оперативниот систем ќе биде достапна за корисниците на поддржаните iPhone уреди во понеделник, 14 септември, како бесплатно софтверско ажурирање.
iOS 27 беше претставен уште во јуни, по што помина низ неколкумесечно бета-тестирање. Новата верзија на системот ќе биде претходно инсталирана и на iPhone 18 Pro и 18 Pro Max, чии преднарачки започнуваат на 12 септември, додека во продажба ќе пристигнат шест дена подоцна, на 18 септември.
Една од главните новини во iOS 27 е Siri AI, значително редизајнирана верзија на гласовниот асистент на Apple која користи Apple Intelligence за подобро да ги разбира барањата на корисникот и нивниот контекст. Новата Siri може да користи личен контекст од пораки, е-пошта и фотографии, да ја препознава содржината прикажана на екранот и да извршува дејства во апликациите на Apple и во апликациите од трети страни.
Siri AI со објавувањето на iOS 27 ќе пристигне во бета-верзија и првично ќе биде достапна на англиски јазик, додека поддршката за француски, јапонски, корејски, португалски и шпански јазик ќе пристигне во октомври.
Сепак, корисниците во Европската Унија (тоа не важи за Македонија) засега нема да можат да ја користат Siri AI на iPhone и iPad. Apple уште во јуни потврди дека поради барањата на европскиот Закон за дигитални пазари (DMA), Siri AI нема да биде достапна во ЕУ со објавувањето на iOS 27 и iPadOS 27, а засега не е познато кога тоа би можело да се промени. Ограничувањето се однесува и на watchOS 27, бидејќи Siri AI на Apple Watch бара поврзан iPhone со поддршка за оваа функција.
Но, ако тоа е некаква утеха, Siri AI сепак ќе биде достапна за корисниците во ЕУ на macOS 27 и visionOS 27. Покрај iOS 27, Apple на 14 септември ќе ги објави и новите верзии на останатите свои оперативни системи.
