Петте поддржани медиуми ќе продуцираат специјализирани содржини за теми од јавен интерес кои често остануваат надвор од фокусот на мејнстрим медиумите.
Пет медиуми, меѓу кои и веб-порталот Конект.мк добија грантови за продукција на медиумски содржини од јавен интерес во рамките на проектот SMS Facility – Поддршка за малите медиуми од Западен Балкан. За разлика од претходните циклуси каде примарниот фокус беше ставен на општото локално известување, овој циклус става акцент на специјализираното новинарство.
Поддржаните проекти во наредниот период ќе обработуваат специфични, но суштински општествени прашања: од улогата на спортот и дигиталните креативни индустрии, преку родовата еднаквост, правата на маргинализираните заедници до проблемите на руралните средини – теми што често остануваат надвор од радарот на мејнстрим медиумите.
Покрај финансиската поддршка за продукција, проектот обезбедува и значајна компонента за јакнење на капацитетите на медиумите. Добитниците ќе имаат пристап до стручна менторска поддршка, како и едукативни курсеви, работилници и обуки. Развиени се и специјализирани алатки и методологии за самопроценка и организациски развој.
Добитници на грантовите во овој циклус се:
- Друштво за интернет медиуми КОНЕКТ.МК ДООЕЛ Скопје (konekt.mk) со проектот „Невидливи локални приказни: аналитичко новинарство за заедници надвор од медиумскиот фокус“. Фокусот е ставен на руралната маргинализација, социјалната инклузија, лицата со попреченост и младинските прашања. Преку теренско истражување, медиумот ќе им даде глас на заедниците кои ретко добиваат континуирано медиумско внимание
- Здружение на граѓани ГРАЃАНСКИ ПАТЕКИ Битола (evo.mk) со проектот „Гласот на заедницата: Дигитален сторителинг за критични локални и регионални прашања низ призмата на граѓанинот“. Проектот ќе се фокусира на Пелагонискиот регион, обработувајќи теми како екологијата, медиумската писменост, образовната миграција и родово базираното насилство, преку иновативни мултимедијални формати и директно вклучување на граѓаните во креирањето на уредувачката политика.
- Друштво за креативни услуги ГГ Шарено ДООЕЛ Скопје (GG.MK) со проектот „Game Divas ON AIR“. Овој специјализиран гејминг медиум ќе ја истражува улогата на жените во индустријата за видеоигри и е-спортот. Преку поткасти, интервјуа и видео-сведоштва, проектот има за цел да ја зголеми видливоста на жените и девојките во дигиталните креативни професии и да поттикне поголема младинска инклузија во овој брзорастечки сектор.
- Друштво за трговија и услуги „24 Медиа Гроуп“ ДООЕЛ Скопје (24rakomet.mk) со проектот „Зад рефлекторите“. Специјализираниот спортски портал преку серијал од документаристичко-новинарски емисии ќе ја истражува пошироката општествена улога на спортот. Фокусот ќе биде на инклузивноста, женскиот ракомет, волонтерството, руралната маргинализација и развојот на младите преку улогата на спортските работници и родителите.
- Здружение за феминистичка продукција, израз и делување Платформа Медуза Скопје (meduza.mk) со проектот „Гласови што недостигаат“. Проектот предвидува продукција на истражувачки и видео есеи посветени на феминизмот, ЛГБТИК+ правата, репродуктивното и сексуално здравје, работничките права и социјалната правда. Целта е да се зголеми застапеноста на искуствата на сексуалните и родовите малцинства во јавниот дискурс.
Овие грантови претставуваат континуитет во напорите на Фондацијата Метаморфозис за зајакнување на независноста и одржливоста на медиумскиот сектор, нудејќи не само ресурси за продукција, туку и знаење за долгорочен развој на медиумите.
Регионалниот проект SMS Facility – Поддршка за малите медиуми од Западен Балкан, кофинансиран од Европската Унија, се спроведува во партнерство со пет граѓански организации за поддршка на медиуми – Центарот за промоција на граѓанско општество CPCD (Босна и Херцеговина) како водечки партнер, Томсон медиа (Германија), Наука и иновација за развој SCIDEV (Албанија), Косово глокал (Косово) и Центарот за демократска транзиција CDT (Црна Гора).
