Како процесот за добивање кредит да трае само неколку минути, а истовремено да обезбеди сигурна и законски усогласена идентификација на клиентот, валидна согласност и правно признат електронски потпис?
Ова прашање беше во фокусот на разговорот насловен „Кредит за пет минути, брзо, едноставно и усогласено со регулативите?“, што новинарот Горан Петрески го водеше со Ловро Персен, директор за спречување измами со лични документи во Evrotrust Technologies, на регионалната конференција MicroBalkans 2026.
Како претставник на давател на шема за дигитален идентитет и квалификувани доверливи услуги од Европската Унија, Персен зборуваше за практичните предизвици со кои се соочуваат банките и финансиските компании при преминот кон целосно дигитално, односно онлајн кредитирање.
Според него, клиентот очекува едноставен процес и одлука за неколку минути, но зад таквото искуство мора да стои сигурен механизам за идентификација, давање согласност и потпишување.
„Финансиските институции мора да бараат давател на решенија и услуги кој е сертифициран согласно регулативата eIDAS 2.0 и кој обезбедува интероперабилност и минимизирање на фрагментацијата во секојдневното работење. Во исто време, оваа сертификација гарантира највисоки безбедносни стандарди за верификација на идентитетот на секој клиент, дури и надвор од финансиските институции. Компаниите честопати очекуваат чуда од IDV и апликациите за електронско потпишување, но нивните деловни одлуки неретко се основната причина за измамите од кои страдаат. Користењето веб апликација за прикачување документи за лична идентификација или непостоењето функционалности за откривање напади со вметнување содржина (Injection Attack) е исто како да ја оставите вратата од вашиот дом отворена за кој било крадец од соседството. Поедноставувањето на процесот не смее да значи отстранување на безбедноста“, истакна Персен.
Во разговорот беше посочено дека дигиталното кредитирање денес оди многу подалеку од онлајн апликација за кредит. За целосно дигитален процес потребни се далечинска електронска идентификација и верификација на идентитетот, валидно изразена согласност, соодветен електронски потпис и проверлив доказ за секој чекор во процесот.
Посебен фокус беше ставен на дигиталниот идентитет за повеќекратна употреба, европските паричници за дигитален идентитет (EUDI Wallet) и eIDAS 2.0, како и на тоа како овие технолошки и регулаторни промени се очекува да ја обликуваат иднината на финансиските услуги во Западен Балкан.
Evrotrust Technologies е давател на гарантиран електронски идентитет и квалификувани доверливи услуги (QTSP), сертифициран согласно европската регулатива eIDAS 2.0 и релевантната регулатива во Македонија. Компанијата овозможува целосно далечинско користење услуги за електронска идентификација, квалификуван електронски потпис, квалификуван електронски печат, квалификуван временски жиг и квалификувана електронска достава на дигитални документи.
Учеството на MicroBalkans 2026 доаѓа во период кога Evrotrust го зајакнува своето присуство во Македонија, пренесувајќи европско искуство во дигиталната идентификација и доверливите услуги на локалниот пазар. Компанијата им овозможува на банките, финансиските институции и другите регулирани компании да дигитализираат процеси кои традиционално бараат физичко присуство, хартиени документи и рачно потпишување. Целта е европските стандарди, технологијата и искуството во дигиталната доверба да станат достапни за македонските компании и институции.
