Социјалната мрежа Instagram им овозможи на корисниците да користат нови шаблони и алатки за да им го олесни креирањето на популарните Reels.
Покрај новите шаблони и алатки, Instagram во наредните недели ќе ги конвертира сите видео објави во Reels, како што беше најавено претходно.
Новитетите претставуваат „оружје“ на Instagram за борба против ривалот TikTok, а станува збор за проширување на можностите, односно начин за соработка со корисниците со помош на Reels. Корисниците сега можат да ремиксираат не само видеа, туку и фотографии на Instagram, за да имаат повеќе материјал за користење.
Создавачите на содржини сега можат да користат зелен екран, поделен екран или приказ на реакција слика-во-слика, и лесно е да ја додадат нивната содржина на постоечки Reel. Дополнително, корисникот може да го постави својот ремикс на крајот од оригиналниот Reel наместо да ги прикажува еден до друг. Овој формат функционира подобро кога креаторот сака да го изрази своето мислење за „жешка тема“ или да побие некои тврдења.
Компанијата Meta, која е сопственик на Instagram, воведе и шаблони за да го олесни креирањето на Reels со претходно вчитани аудио и видео ефекти, доволно е само да додадете своја фотографија или видео. Корисникот може да пристапи до колекцијата на шаблони со допирање на иконата на камерата во табот Reels.
Друга иновација која ќе му помогне на Instagram да се носи со TikTok е можноста за истовремено снимање со предната и задната камера на мобилниот телефон преку апликацијата.
Meta ги потврди и шпекулациите дека сите видео содржини објавени на Instagram ќе бидат претворени во Reels, но тоа важи за клипови пократки од 15 минути. Во апликацијата може да се препорачаат клипови пократки од 90 секунди и би можеле да имаат поширок дофат.
Сепак, Instagram нема да ги препорачува оние Reels кои се кај корисници со приватни профили и нема намера ретроактивно да ги конвертира старите објави. Оваа функција доаѓа во наредните недели и ќе ги консолидира сите видеа и Reels под една картичка во апликацијата.
Instagram пред неколку дена воведе функција која ќе им овозможи на инфлуенсерите да заработат пари од нивните Reels. Креаторите сега можат да споделуваат Reels само со претплатници со „заклучување“ на содржината зад paywall.
Meta им вети на креаторите дека нема да им ја намали заработката до 2024 година, но ставањето на Reels зад paywall е еден од начините за нивна монетизација. Директорите на компанијата претходно изјавија дека имаат намера да се фокусираат на монетизација на Reels што е можно поскоро во втората половина на 2022 година, така што веројатно во блиска иднина ќе видиме повеќе функции посветени на заработка на кратки клипови.