Во текот на следниот месец, Microsoft би можел да покаже како ќе изгледа имплементацијата на вештачката интелигенција во пакетот Office на компанијата.
Microsoft има големи планови кога е во прашање вештачката интелигенција, која би можела да стане клучен дел од повеќето производи на компанијата. Првите индикации за тоа што може да очекуваме неодамна ги добивме кога ја претставија надградената верзија на пребарувачот Bing и интернет прелистувачот Edge во кој беше имплементирана оваа технологија.
Затоа, Bing и Edge се само почеток, а нивните најпопуларни производи како Word, PowerPoint, Outlook и други апликации наскоро ќе следат. Треба да дознаеме како Microsoft ја замислил имплементацијата на вештачката интелигенција во Word и други алатки за еден месец, кога се очекува и официјалната презентација. Така барем тврдат технолошките медиуми запознаени со состојбите во компанијата.
Вештачката интелигенција во PowerPoint и Excel може, врз основа на корисничките упатства, сама по себе да креира различни скици и графикони, што би ја поедноставило и забрзало работата на презентациите. Исто така, не е тешко да се заклучи врз основа на сето она што досега го видовме со ChatGPT, дека во рамките на Word и другите апликации, вештачката интелигенција на Microsoft би можела да пишува различни текстови, да одговара на мејлови и слично. Сè што треба да направи корисникот е да обезбеди што е можно попрецизни упатства и текстот брзо ќе се појави на екранот. После тоа, потребно е само уредување на содржината и евентуално исправање на граматичките грешки.
Со оглед на тоа што неодамна ги претставија Bing и Edge со вештачка интелигенција, ова брзо претставување на други производи е само доказ дека на Microsoft му се брза. Многумина беа воодушевени од ChatGPT и неговите можности, па со тој четбот беше лансирана вистинска револуција на вештачката интелигенција и компаниите сега се обидуваат што поскоро да ги претстават своите алатки и производи со вештачка интелигенција, за што побрзо да го заземат своето место на овој пазар.
До неодамна никој не можеше ни да замисли дека толку брзо ќе се појави конкурент на пребарувачот Google, но ситуацијата радикално се промени со воведувањето на споменатиот четбот, кој ни покажа како пребарувањето на интернет може да биде различно и поедноставно. Неодамна Google воведе и сопствен чет-бот со вештачка интелигенција, кој на почетокот не се прослави, па поради само една грешка пазарната вредност на компанијата падна за повеќе од 100 милијарди долари.
Како што пренесуваат на порталот The Verge, Microsoft е свесен дека секогаш постои можност да се појават нови конкуренти кои би можеле да го размрдаат пазарот и да го загрозат нивниот Office на сличен начин како што Microsoft сака да му се закани на пребарувачот Google.