Samsung кон крајот на јули ќе организира уште еден Unpacked настан, каде ќе претстави еден куп нови производи. Сепак, однапред протекоа официјални фотографии од сите очекувани уреди – Galaxy Buds3, Galaxy Watch6, Galaxy Z Flip5, Galaxy Z Fold5 и Galaxy Tab S9 таблет уредите. Најновата серија маркетиншки фотографии доаѓаат од познатиот дојавувач Еван Блас (@evleaks).
Една од фотографиите ги прикажува Galaxy Z Flip5, Galaxy Tab S9, Galaxy Watch6 и Galaxy Buds3 заедно. Слушалките се во бела боја, додека Galaxy Watch6 и Galaxy Z Flip5 се прикажани во зелена нијанса. Иако на фотографијата стои текст Galaxy Tab S9 Ultra, на неа може да се види уште еден таблет од серијата.
Друга фотографија го прикажува големиот, асиметричен надворешен дисплеј на Galaxy Z Flip5, кој уредот ќе го користи да се натпреварува со неодамна претставениот Motorola Razr 40 Ultra. Потоа следува фотографја од од Galaxy Z Fold5, кој на прв поглед нуди непроменет дизајн. Сепак, двата телефони на преклопување ќе имаат нови шарки кои ќе го елиминираат јазот помеѓу двата дела кога се преклопени.
Сликите од паметните часовниците потврдуваат дека ротирачката рамка ќе се врати кај Galaxy Watch6 Classic, додека Galaxy Watch6 ќе пристигне без рамка. Сепак, и двата часовника имаат намалени рамки околу кружните Super AMOLED екрани.
Заедно со ова, @_snoopytech_ сподели на Twitter и маркетиншка фотографија од очекуваните таблет уреди од Galaxy Tab S9 серијата. Сликата открива дека Galaxy Tab S9 Ultra повторно ќе има засек во дисплејот за предната камера, а уредите ќе го поддржуваат и S Pen пенкалцето и се чини дека ќе бидат отпорни на вода.
Засега Samsung не го открива точниот датум на следниот Unpacked настан, но неодамна потврди дека ќе се одржи кон крајот на јули, а првпат ќе биде во матичната земја на компанијата, поточно во Сеул. Пред-нарачките за уредите ќе започнат набрзо по лансирањето, а продажбата би требало да започне во август.