OnePlus кон крајот на август се очекува да го претстави својот прв преклопен паметен телефон, кој би можел да му парира на Galaxy Z Fold 5 на Samsung.
Во сенка на Galaxy Unpacked настанот на Samsung, кој со себе донесе бројни новитети, OnePlus го откри името на својот прв смартфон со екран на преклопување – OnePlus Open.
„Додека ние отвораме, други се затвораат“, гласи играта со зборови што кинескиот производител ја објави на својот официјален Twitter профил и со тоа ја заскокотка фантазијата на многубројните фанови.
We OPEN when others FOLD
— OnePlus (@oneplus) July 26, 2023
Според претходно објавените информации, OnePlus Open се очекува да биде претставен на крајот на август во Њујорк. Познатиот дојавувач OnLeaks објави рендери кои го прикажуваат дизајнот на првиот мобилен уред на OnePlus на преклоп кон средината на јули во соработка со SmartPrix. Доколку се покажат како точни, телефонот ќе има поголем и заоблен систем на камера потпишан од Hasselblad.
Од останатите спецификации, се наведува дека OnePlus Open ќе има 6,3-инчен AMOLED надворешен дисплеј со Full HD+ резолуција и стапка на освежување од 120 Hz. Во внатрешноста ќе има 7,8-инчен LTPO AMOLED екран со резолуција од 1.900 x 2.100 и стапка на освежување што се движи од 1 до 120 Hz. Надворешниот дисплеј би требало да има вградена камера од 20 мегапиксели, а внатрешната 32 MP.
Телефонот најверојатно ќе го покренува Snapdragon 8 Gen 2 чип на Qualcomm, поврзан со до 16 GB RAM и 512 GB приостор за складирање, како и батерија од 4.800 mAh што поддржува полнење од 67 W. Системот на камери треба да биде ист како кај OnePlus 11, освен телефото сензорот. Значи, се очекува главен сензор од 50 мегапиксели со OIS, телефото сензор од 64 мегапиксели и ултра-широк сензор од 48 мегапиксели со автофокус.