Во Македонија од 2010 година функционира Агенција за нуклеарна технологија, за која јавноста речиси и да не е запознаена. Две собраниски комисии неодамна дадоа согласност за нејзино укинување, како и за поништување на законот со кој беше основана оваа национална агенција. Законот, донесен пред 14 години, беше инициран од Министерството за образование под раководство на тогашниот министер Никола Тодоров. Сепак, од своето основање, Агенцијата никогаш не регрутирала ниту еден вработен.
Целта на тогашното формирање на оваа агенција беше развој на технологии и истражувања од областа на нуклеарната физика, физиката на елементарните честички и други истражувања од областа на нуклеарната наука. Било предвидено Агенцијата да учествува во научните програми на Европската организација за нуклеарни истражувања ЦЕРН, да развива апликации за индустријата, медицината, енергијата и нуклеарната технологија.
Секоја година за оваа агенција се издвојуваат средства од државниот буџет, но последен пат оваа Агенција потрошила средства во 2014 година. Претходно на сметката на Агенцијата се уплаќале трошоци за патување во странство, но нема информации кој од таа сметка отпатувал во странство. Пари се одвојувале само за хонорарите на членовите на управниот одбор и за академик од МАНУ.
Оваа агенција финансиски е активна само две години. Во првите пет години од формирањето на Агенцијата, според буџетските планови на располагање беа речиси 400 илјади евра. Канцелариите на Агенцијата до пред три месеци беа во зградата „Една точка за услуги“, до Уставниот суд.