WhatsApp наскоро ќе ја зајакне приватноста на своите корисници, овозможувајќи им да го сокријат својот телефонски број во разговорите. Промените ќе бидат видливи во четовите, а правилата ќе бидат строго утврдени.
Делењето телефонски број со непознати лица секогаш носи ризик, а жените особено може да се соочат со непријатности. Исто така, постојат бројни измами и спам-пораки, па дури и давање број на една личност може да доведе до несакани пораки, повици, понуди и слично.
Сепак, WhatsApp се подготвува да ја лансира одамна очекуваната функција – користење на кориснички имиња. Корисниците наскоро ќе можат да се поврзуваат без да го откријат својот телефонски број. Оваа функција сè уште е во развој, но веќе се појави во поновите бета верзии на апликацијата. Таа е многу слична на тоа што веќе го нудат платформи како Telegram и Signal. Откако ќе стане достапна, корисниците на WhatsApp ќе можат да создадат единствено корисничко име, што ќе им овозможи поголема контрола над тоа кој може да го види нивниот број.
Целта на воведувањето кориснички имиња е заштита на корисниците на WhatsApp од несакани контакти.
Кога ќе започне разговор без претходно споделување на контактот, ќе биде видливо само корисничкото име, а не и телефонскиот број. WhatsApp потврди неколку правила за овој систем. Корисничките имиња мора да содржат помеѓу три и 30 знаци, и најмалку едно буква. Исто така, треба да се избегнуваат одредени формати.
Единствените кориснички имиња не смеат да започнуваат или завршуваат со точка, да содржат две точки по ред, да започнуваат со „www“, ниту да завршуваат со доменот „.com“, за да се спречат измами и лажно претставување.
Дозволени се само мали букви, броеви, долна црта и точки. Дупликати на кориснички имиња нема да бидат дозволени, како ни формати како оној на Telegram – на пр. @user1234.
Кога корисникот на WhatsApp ќе го промени своето корисничко име, сите во неговите четови ќе бидат известени за тоа. WhatsApp развива системски генерирана порака која ќе ги известува останатите за промената. Во моментов, така функционира и промената на профилната слика или телефонскиот број. Овие известувања ќе се појавуваат во реално време во четовите, што ќе помогне во спречување на конфузија и лажно претставување.
Идното ажурирање за WhatsApp Web ќе им овозможи на корисниците да проверат дали одредено корисничко име е сè уште достапно. Скриеното поле за регистрација веќе беше откриено кон крајот на мај, што укажува на тоа дека WhatsApp активно се подготвува за поширока имплементација на сите платформи. По изборот на валидно корисничко име, корисниците ќе видат екран за потврда со анимација со конфети.
Од тогаш, сите со кои ќе започнете разговор ќе го гледаат само вашето корисничко име.
WhatsApp работи на воведување на кориснички имиња повеќе од две години, а напредокот е особено видлив во последно време. Иако функцијата сè уште не е активна дури ни за бета тестерите, присуството на кодот укажува дека корисниците нема уште долго да чекаат.
