Верзијата Qi2.2.1 овозможува Android телефоните да добијат брзо безжично полнење од 25W и магнетна стабилност слична на MagSafe системот.
Безжичното полнење влегува во нова фаза со доаѓањето на стандардот Qi2.2.1, кој носи брзина поголема од 25 W и воведува магнетна стабилност слична на Apple MagSafe системот. WPC (Wireless Power Consortium) потврди дека Qi2 ќе стане новиот стандард за главните производители на Android, а бројни уреди веќе се во процес на сертификација.
И додека Apple iPhone моделите веќе го имаат усвоено Qi2 стандардот (но само првата верзија со максимално полнење од 15W), Android уредите досега заостануваа, а многу од нив воопшто не ги поддржуваа магнетните елементи потребни за Qi2 функционалностите, што го отежнуваше користењето на магнетни држачи, power bank уреди и слични додатоци, а често предизвикуваше и загуби на енергија при полнењето.
Со доаѓањето на Qi2.2.1 стандардот, брзината на полнење се зголемува на 25W, а потврдено е дека брендови како Ugreen, Belkin и Anker веќе имаат сертифицирани полначи, power bank уреди, држачи и авто додатоци. Најважното прашање останува: кои телефони први ќе добијат поддршка?
WPC наведува дека, покрај Apple, и водечките Android производители ќе почнат да ја интегрираат Qi2 технологијата, при што во моментов стотици уреди се наоѓаат во фаза на тестирање за 25W Qi2 сертификација.
Иако сè уште нема официјална листа на брендови, најголемо внимание привлекува серијата Google Pixel 10, чие претставување е најавено за 21 август. Се очекува таа да поддржува Qi2.2 брзо полнење со магнетниот систем наречен „Pixelsnap“, кој овозможува искуство слично на Apple MagSafe решението. Имајќи предвид дека WPC ги спомнува „главните брендови“, постои голема веројатност дека и Samsung, како лидер на пазарот, ги подготвува своите Qi2.2 телефони, пренесува LTN.
