Qualcomm го претстави Snapdragon 8 Elite Gen 5 чипсетот, а првите паметни телефони што ќе го користат ќе бидат уредите од Xiaomi 17 и Galaxy S26 серијата
Qualcomm официјално го претстави својот нов премиум мобилен чипсет: Snapdragon 8 Elite Gen 5. Овој процесор ќе биде основа на следната генерација Android флегшип телефони, а една од првите компании што ќе го имплементира е Xiaomi, и тоа во моделите: Xiaomi 17, 17 Pro и 17 Pro Max. Исто така, се очекува серијата Samsung Galaxy S26 да добие специјална варијанта на овој чип под брендот “Snapdragon 8 Elite Gen 5 for Galaxy”.
На прв поглед изгледа дека Qualcomm прескокнал неколку генерации, бидејќи минатогодишниот Snapdragon 8 Elite логично можеше да биде проследен со верзија Gen 2. Сепак, компанијата објаснува дека новото име ја рефлектира петтата генерација на нивните најмоќни процесори од „серијата 8“, откако преминаа на поедноставен систем на ознаки со едноцифрено нумерирање.
Snapdragon 8 Elite Gen 5 пристигнува во Xiaomi 17 и Galaxy S26 серијата
Линијата изгледа вака: Snapdragon 8 Gen 1, Gen 2, Gen 3, Snapdragon 8 Elite (третиран како “Gen 4”), а сега Snapdragon 8 Elite Gen 5. Со ова Qualcomm сака да ја нагласи својата лидерска позиција и да им олесни на корисниците во разбирањето на производствената стратегија и идните модели.
Xiaomi, од друга страна, го прескокнува бројот 16 и директно излегува со серијата 17, со јасна цел да конкурира на Apple iPhone 17 моделите. Се очекува новиот чипсет да биде изработен во TSMC 3 nm процес и да користи специјални Oryon јадра, што треба да донесе значителен скок во перформансите и енергетската ефикасност.
Повеќе технички детали ќе бидат претставени за време на Snapdragon Summit манифестацијата што ќе се одржи подоцна во текот на годината, кога Qualcomm ќе ги открие сите карактеристики на својот најнов процесор.
