Google развива Android PC со Gemini AI и Google асистент, а првите компјутери се очекуваат веќе во 2026 година.
Google официјално најави дека Android во иднина нема да биде ограничен само на телефоните, туку дека се подготвува и влез во светот на лаптоп и десктоп компјутерите. Рик Остерхло, потпретседател на Google за хардвер, откри на Qualcomm Snapdragon самитот дека е во развој нов проект: компјутер базиран на Android оперативниот систем.
Остерхло истакна дека досега телефоните и компјутерите користеле целосно одвоени системи, додека идејата на овој проект е да ги обедини и понуди единствено искуство. Новиот Android PC ќе има можност за користење на Google вештачката интелигенција, вклучително и Gemini моделите и Google асистентот, а истовремено ќе го донесе целиот екосистем на апликации и алатки наменети за Android платформата во PC околина.
„Сметам дека ова е нов начин на кој Android може да им служи на сите, во различни категории компјутери“, нагласи Остерхло, практично потврдувајќи дека Android компјутерите наскоро ќе се појават.
Android доаѓа и на компјутерите
На истиот настан, извршниот директор на Qualcomm, Кристијано Амон, потврди дека веќе имал можност да ги види првите демонстрации на оваа технологија, оценувајќи ги како „навистина неверојатни“. Неговиот ентузијазам јасно покажува колку Qualcomm полага надежи во оваа соработка.
Директорот на Android, Самир Самат, додаде дека е „многу возбуден за она што доаѓа следната година“, што силно упатува на тоа дека првите Android PC машини би можеле да дебитираат веќе во текот на 2026 година.
Се очекува токму Qualcomm процесорите, развиени за вештачка интелигенција и напредни мобилни перформанси, да бидат клучната основа на овие уреди. Android компјутерите би можеле да понудат флексибилна околина која го комбинира најдоброто од мобилното и десктоп искуството, што би значело целосно нова категорија уреди на пазарот и сериозна конкуренција на традиционалните Windows и ChromeOS машини.
