Google Drive тестира нов AI скенер со побрзо автоматско препознавање на документи и нов Material 3 Expressive дизајн.
Google Drive веќе со години нуди функција за скенирање документи, но новата надградба носи значајни промени. Google тестира нова опција во рамките на Workspace Labs, која воведува скенер на документи со AI поддршка, целосно автоматски режим на работа и нов Material 3 Expressive кориснички интерфејс.
Досега, скенерот во Google Drive бараше рачно активирање на снимањето или користење на автоматски режим преку посебен лизгач. Новиот дизајн ја отстранува таа опција и воведува целосно автоматско препознавање на документи штом ќе се активира камерата. Камерата сега автоматски ги скенира документите додека корисникот ги поставува страниците пред објективот. Ако скенерот детектира нова страница, веднаш ја додава во постоечкиот PDF без потреба од дополнителни притискања на копчиња.
Новиот AI скенер во Google Drive носи побрзо и поинтелигентно скенирање документи
Промените вклучуваат и редизајн на камерата. Новиот Material 3 Expressive интерфејс носи повпечатливи бои и реорганизирани контроли, додека копчето за снимање е преместено на десната страна од екранот. Копчето за галерија и понатаму е присутно, но лизгачот за режими е отстранет. Контурите на препознаените документи сега се нагласени со зелени и сини рабови, што потсетува на визуелниот стил на Samsung Galaxy уредите.
Во пракса, новата функција драстично го забрзува процесот. Тестирањето на Pixel 10 Pro XL уред покажало дека скенирањето на обемна правна документација се сведува од неколку минути на само неколку секунди, при што страниците се препознаени и додадени во правилниот редослед.
Покрај автоматското скенирање, новата функција носи и унапреден уредувач на документи во рамките на Google Drive, овозможувајќи им на корисниците попрецизно уредување пред датотеката да биде зачувана или споделена со други корисници.
Моментално новата опција е во тест фаза и достапна само за избрани корисници на Google Workspace Labs. Кога ќе се активира, ќе се појави нов таб во скенерот внатре во Drive апликацијата. Верзија достапна за пошироката јавност сè уште не е објавена, но се очекува во наредните месеци да биде достапна за сите корисници, пренесува 9to5Google.
