Уредите од Xiaomi 17 серијата се продаваат со брзина на молња, поради што Xiaomi одлучи да го зголеми производството за да ја задоволи побарувачката.
Минатата недела Xiaomi ја претстави својата нова флегшип серија телефони, Xiaomi 17, која веќе руши рекорди во продажбата.
Имено, претседателот на Xiaomi, Лу Вејбинг, сподели на Weibo дека Xiaomi 17, Xiaomi 17 Pro и Xiaomi 17 Pro Max се продадени во повеќе од еден милион примероци за само една недела од првичното претставување. Бидејќи станува збор за продажен успех што ниту една друга серија на Xiaomi не го постигнала во толку краток период, Вејбинг најави зголемување на производството.
Лесно е да се претпостави дека успехот на новите Xiaomi 17 лежи токму во дизајнот што потсетува на новите модели на iPhone, со додаток на корисен секундарен екран на задната страна вграден во модулот за камера. Исто така, не треба да се заборави дека станува збор за првите телефони на пазарот што ги придвижува најмоќниот SoC на Qualcomm досега – Snapdragon 8 Elite Gen 5.
Дали овој успех ќе се повтори и кога телефоните ќе пристигнат во Европа, останува да видиме.
