Apple планира сите модели од серијата iPhone 18 да ги опреми со најмалку 12 GB RAM меморија, благодарение на новите LPDDR5X чипови што ги произведува Samsung.
Според најновите информации, Apple подготвува значително зголемување на количината на меморија кај својата наредна генерација телефони. Моделите iPhone Air, iPhone 17 Pro и iPhone 17 Pro Max веќе располагаат со 12 GB RAM меморија, што е за 4 GB повеќе во однос на нивните претходници, додека стандардниот iPhone 17 сè уште користи 8 GB. Сепак, тоа би можело да се промени со доаѓањето на серијата iPhone 18, бидејќи Apple наводно планира да воведе единствена количина RAM меморија кај сите варијанти на iPhone.
Според извештаите, Apple побарал од Samsung да ја зголеми испораката на LPDDR5X мемориски чипови за следната генерација iPhone уреди. Овие чипови, претставени во 2024 година, се достапни само во конфигурации од 12 и 16 GB, што практично ја елиминира можноста iPhone 18 да остане со 8 GB RAM.
Единствена RAM конфигурација за целата iPhone 18 линија поради подобри AI перформанси
Покрај Samsung, Apple преговара и со SK Hynix и Micron за дополнителни количини DRAM меморија, со цел да обезбеди стабилно снабдување за претстојните модели. Поголемата количина RAM меморија ќе биде клучна за напредните AI функции, кои сè повеќе се потпираат на локална обработка на податоци директно на уредот, без користење на „cloud“ интернет инфраструктурата.
Според моменталните планови, iPhone Air 2, iPhone 18 Pro, iPhone 18 Pro Max и преклопливиот iPhone треба да бидат претставени на есен 2026 година, додека стандардниот iPhone 18 и iPhone 18e се очекуваат во првата половина на 2027 година.
Со овој потег, Apple продолжува да ги засилува хардверските перформанси на своите телефони, создавајќи предуслови за следната генерација интелигентни iPhone уреди, подготвени за обработка на сложени задачи поврзани со вештачката интелигенција, пренесува MacRumors.
