По ажурирањето на iOS 26, многу корисници пријавуваат значително пократко траење на батеријата, дури и кај најновите модели на iPhone.
Откако iOS 26 беше објавен во септември, на социјалните мрежи и форумите се појавија бројни поплаки дека новата верзија на системот драстично го скратува траењето на батеријата, особено на iPhone уредите. Еден корисник навел дека неговиот iPhone 15, кој е целосно нов, се испразнил од 90% на 45% без никаква употреба и без апликации што работат во позадина, заклучувајќи дека единствениот виновник е токму iOS 26.
Слични жалби го преплавија Reddit, каде што корисниците на моделите iPhone 13, 14 и 16 наведуваат дека автономијата на нивните телефони се скратила за неколку часа. Еден од нив истакнал дека порано го завршувал денот со 87% батерија, а сега едвај останува над 50%, иако батеријата е скоро нова. Многумина тврдат дека батеријата особено се троши при скролање низ новите Liquid Glass ефекти во интерфејсот.
Корисници од целиот свет тврдат дека iOS 26 ја празни батеријата со забрзано темпо
На социјалната мрежа X (поранешен Twitter), корисниците исто така се жалат дека нивниот iPhone 16 Pro сега станал „телефон за половина ден“, бидејќи не може да издржи ни до попладне без полнење.
Apple реагираше со објаснување на својата страница за поддршка. Компанијата наведува дека ваквите проблеми се нормални по големи ажурирања, бидејќи уредот извесно време работи во позадина — индексира податоци, ги ажурира апликациите и презема нови системски елементи. Според нив, сето тоа може привремено да влијае на перформансите и траењето на батеријата, но состојбата треба да се стабилизира со следните ажурирања на iOS 26.
Apple тврди дека падот на траењето на батеријата е привремен
Apple исто така им препорачува на корисниците да ги ажурираат сите апликации, да ги исклучат функциите кои трошат повеќе енергија, како ProMotion, и да го активираат режимот за заштеда на енергија (Low Power Mode). Некои корисници потврдиле дека повторното рестартирање на уредот по ажурирањето на апликациите помогнало да се ублажи проблемот.
Сепак, многумина сè уште очекуваат официјална закрпа што трајно ќе го реши овој неочекуван пад на автономијата.
iOS 26 очигледно предизвикува проблеми со потрошувачката на батеријата, а иако Apple тврди дека тоа е привремено, корисниците очекуваат брзо решение преку следното системско ажурирање, пишува Mashable.
