Слушањето музика во доцните години е поврзано со 39 проценти помал ризик од деменција, покажува студија на Универзитетот Монaш спроведена на повеќе од 10.000 Австралијци постари од 70 години.
Студијата, објавена во списанието International Journal of Geriatric Psychiatry, открива дека редовното слушање музика е поврзано со најголемо намалување на ризикот од деменција: 39 проценти помала појава на деменција и 17 проценти помала појава на когнитивно оштетување, како и подобри резултати во вкупните когнитивни способности и епизодно паметење кое се користи за присетување на секојдневни настани.
Когнитивна стимулација
Луѓето кои редовно слушаат музика или свират некој инструмент покажуваат 33 проценти помал ризик од деменција и 22 проценти помал ризик од когнитивно оштетување. Забележливо е дека редовното слушање музика дава поголеми когнитивни придобивки од свирењето инструмент, иако разликата е релативно мала.
Истражувачите нудат објаснување: слушањето музика активира широк спектар на мозочни региони, вклучувајќи ги оние одговорни за паметење, емоционална регулација и внимание, што обезбедува силна когнитивна стимулација. Свирењето инструмент, иако корисно, може да биде ограничено со вежбање и мотивација, додека слушањето музика е полесно да се вклучи во секојдневниот живот.
Улогата на образованието
Ефектите се најизразени кај лица со повисоко образование, што може да укажува на поголема способност на мозокот да се адаптира, опоравува и одржува добри ментални функции дури и кога е изложен на стрес, болест или други предизвици, како и подобра способност за користење на музиката како стимуланс.
„Доказите упатуваат на тоа дека стареењето на мозокот не е само последица на возраста и генетиката, туку на него може да влијаат и сопствените животни стилови и околина“, коментираат австралиските истражувачи. Причинската врска, велат, засега не може да се утврди, но со оглед на тоа што моментално не постои лек за деменција, секоја стратегија која помага во спречување или одложување на почетокот на болеста ќе биде добредојдена.
