Посебното издание на Realme GT 8 Pro носи изглед и детали инспирирани од F1 тимот Aston Martin, но, за жал на некои, ќе биде достапно само за кинескиот пазар.
Realme го претстави специјалното издание на својот водечки модел, кое сигурно ќе им се допадне на обожавателите на Aston Martin. Станува збор за моделот GT 8 Pro Aston Martin Limited Edition, кој се истакнува со тиркизен заден капак со грб на тимот и жолти детали, вклучително и копчето за вклучување во истата боја.
Телефонот доаѓа во специјално пакување со неколку предмети инспирирани од Формула 1. Во кутијата има дополнителен дизајн на модулот за камерата во зелена боја со шема на карбонски влакна, две заштитни маски, специјално дизајниран алат за вадење SIM-картичка и полнач.
Оваа верзија на GT 8 Pro доаѓа и со различен кориснички интерфејс – со редизајнирани икони, позадини и заклучен екран, сè во духот на F1 тимот Aston Martin. Што се однесува до спецификациите, нема разлики меѓу оваа и стандардната верзија на GT 8 Pro.
Вреди да се напомене дека GT 8 Pro Aston Martin Limited Edition ќе биде достапен исклучиво за кинескиот пазар. Сепак, оние што навистина го сакаат, најверојатно ќе можат да го набават во Европа преку посредници, добро познати меѓу љубителите на кинески телефони.
