Компанијата Sony го објави Lytia 901, 200-мегапикселен сензор кој најпрво ќе се појави во врвните модели на кинеските производители, како што се Oppo Find X9 Ultra и Vivo X300 Ultra.
По долго исчекување, Sony официјално влезе на пазарот на 200-мегапикселни сензори за мобилни телефони. Тие го претставија Lytia 901, сензор најавен како конкурент на Samsung ISOCELL сензорите со 200 MP, а кој веќе овие денови ќе започне да им се испорачува на производителите на телефони.
Станува збор за сензор со формат 1/1.12″ и дијагонала од 14,287 mm, кој користи пиксели од 0,7 микрометри. Сензорот имплементира Quad-Quad Bayer Coding (QQBC) матрица што групира 4×4 блокови пиксели под филтри со иста боја. Сигналите од 16 соседни пиксели се обработуваат како една целина, создавајќи фотографии со резолуција од 12,5 MP со подобрена светлосна чувствителност и детали.
Sony во Lytia 901 вградил и посебен AI процесорски модул директно во самиот сензор — прв таков на пазарот — кој дополнително ја подобрува remosaic обработката при користење на 4x зум во сензорот. Компанијата при тоа ветува „врвна репродукција на фини шари и букви“, како и брза обработка на 4K видео до 30 FPS при 4x зум без значително губење на детали.
Сензорот нуди и технологии DCG-HDR и Fine 12-bit ADC кои ја подигаат квантизациската длабочина од 10 на 12 бита, додека Hybrid Frame HDR (HF-HDR) во QQBC режим овозможува динамички опсег поголем од 100 dB. Ова треба да резултира со значително помало губење детали во посветлите делови од сликата и помал губиток на детали во сенките.
Кога станува збор за фото и видео можностите, Lytia 901 поддржува 8K снимање на 30 FPS и 4K видео до 120 FPS. Во сегментот на фотографија, сензорот овозможува рафално фотографирање со 12,5 MP при 60 FPS, 50 MP при 30 FPS и 200 MP при 10 FPS.
Lytia 901 треба да се појави во претстојните врвни модели на кинеските производители, вклучително и Oppo Find X9 Ultra и Vivo X300 Ultra, но се очекува и поширока примена кај други брендови.
Повеќе информации се достапни на официјалната страница на Sony.
