Раководителот за UI дизајн на Apple, Алан Дај ја напушта компанијата и преминува во Meta, пренесува Bloomberg.
Дај го презеде тимот за дизајн на кориснички интерфејс во 2015 година, кога поранешниот дизајнер на Apple, Џони Ајв, премина на позицијата Chief Design Officer и оттогаш ја извршуваше таа функција оттогаш.
Дај е дел од Apple од 2006 година, приклучувајќи се на маркетинг и комуникацискиот тим како креативен директор. Во 2012 година премина во тимот за кориснички интерфејс на Џони Ајв за да работи на iOS 7, а подоцна работеше на надградбите на дизајнот на iOS, iPadOS, macOS, watchOS и visionOS. Најново, тој помогна во развојот на интерфејсот на Vision Pro и го надгледуваше воведувањето на редизајнот Liquid Glass во iOS 26 и macOS 26.
Apple планира да го замени Дај со Стивен Лемеј, долгогодишен дизајнер во Apple кој е дел од компанијата повеќе од 25 години. Во изјава за Bloomberg, извршниот директор на Apple, Тим Кук го пофали Лемеј.
„Стив Лемеј има одиграно клучна улога во дизајнот на секој голем интерфејс на Apple од 1999 година. Тој секогаш поставува извонредно високо ниво на квалитет и ја отелотворува културата на соработка и креативност на Apple.
Дизајнот е фундаментален дел од тоа кои сме ние во Apple, и денес имаме исклучителен дизајнерски тим кој работи на најиновативната линија на производи во нашата историја.“
Дај ќе се приклучи на Meta како Chief Design Officer на 31 декември и ќе ѝ помогне на компанијата во напорите да навлезе подлабоко во потрошувачкиот хардвер. Тој ќе раководи со новото дизајнерско студио на Meta, надгледувајќи го дизајнот на хардверот и софтверот, со фокус на унапредување на Meta уредите како слушалки и паметни очила со AI функционалности.
