Додека претстојните модели на Galaxy S26 ќе користат екрани како и нивните претходници, Samsung ќе ги испорачува своите најнапредни екрани за новите модели на iPhone.
Според нови гласини од Кина, Samsung ќе ги испорачува своите најнапредни екрани на Apple, додека претстојните Galaxy S26 ќе ја користат минатогодишната технологија. Станува збор, наводно, за значително посветли екрани кои BOE едноставно не може да ги испорача, поради што Apple решил целосно да се сврти кон Samsung.
Ваквиот развој на настаните се вклопува со претходните извештаи според кои iPhone 18 Pro и iPhone 18 Pro Max ќе користат напредни LTPO+ OLED панели – технологија што во моментов можат да ја испорачуваат само Samsung и LG.
Како што веќе пишувавме пред неколку дена, LTPO+ екраните би им донеле на iPhone-ите поголема осветленост и подобра енергетска ефикасност. Исто така, би овозможиле и дополнителни дизајнерски промени, па веќе се споменува поставување на IR скенерот за Face ID под самиот екран, како и криење на предната камера.
Доколку ова се покаже како точно, iPhone 18 Pro и iPhone 18 Pro Max би можеле да го имаат досега најчистиот и наједноставниот дизајн од предната страна.
