Интерни документи откриваат дека Meta проектирала заработка од дури 16 милијарди долари од реклами поврзани со измами, свесно игнорирајќи внатрешни предупредувања и недоволно заштитувајќи милијарди свои корисници.
Според документите, кои ги објави Reuters, компанијата со години профитирала од реклами кои промовираат измами и забранети производи, додека не успевала да ги спречи шемите кои ги таргетираат нејзините корисници. Иако имала внатрешни предупредувања, Meta ги отстранувала огласувачите само кога била 95% сигурна дека се работи за измама — а на сомнителните огласувачи често им наплаќала повисоки цени наместо да ги блокира.
Милијарди долари од сомнителни реклами
Внатрешните проекции од крајот на минатата година покажуваат дека Meta очекувала околу 10% од својот вкупен годишен приход, односно приближно 16 милијарди долари, да потекнува од реклами за измами и забранети производи.
Документите, кои го опфаќаат периодот од 2021 година до денес, откриваат дека технолошкиот гигант со години се бори со лавина лажни реклами за е-трговија, инвестициони измами, нелегални онлајн-казина и продажба на забранети медицински производи на своите платформи — Facebook, Instagram и WhatsApp.
Во еден документ се наведува дека корисниците дневно гледаат во просек 15 милијарди „високоризични“ реклами, кои покажуваат јасни знаци на измама. Само од таа категорија Meta заработува околу 7 милијарди долари годишно. Парадоксално, корисниците кои кликнуваат на вакви реклами добиваат уште повеќе таков тип содржини, бидејќи системот за персонализација им нуди слични огласи според нивните претходни интеракции.
Систем кој ги толерира измамниците
Голем дел од измамите доаѓаат од огласувачи кои внатрешните системи на Meta веќе ги означиле како сомнителни. Но, компанијата ги блокира само ако автоматизираниот систем процени дека има најмалку 95% веројатност дека се работи за измама. Ако сигурноста е помала, Meta наместо тоа им наплаќа повисоки цени за рекламирање — како „казна“ со цел да ги обесхрабри.
Како одговор на обвинувањата, портпаролот на Meta, Енди Стоун, изјави дека документите „прикажуваат селективна слика која го искривува пристапот на Meta кон измамите“. Тој додаде дека процената за 10,1% заработка од сомнителни реклами е „груба и преголема“, тврдејќи дека реалниот број е помал.
„Агресивно се бориме против измамите, затоа што ниту луѓето на нашите платформи, ниту легитимните огласувачи, ниту ние самите ги сакаме тие содржини“, изјави Стоун.
Сепак, документите покажуваат дека во сопствените истражувања Meta заклучила дека „е полесно да се огласуваат измами на платформите на Meta отколку на Google“, што укажува на системски пропусти.
Регулаторен притисок и вистински трошоци
Овие откритија доаѓаат во време кога регулаторите ширум светот вршат силен притисок врз Meta да ги заштити своите корисници. Американската Комисија за хартии од вредност (SEC) ја истражува компанијата поради реклами за финансиски измами, додека британскиот регулатор утврдил дека платформите на Meta биле поврзани со 54% од сите загуби предизвикани од измами со плаќања во 2023 година.
Внатрешните документи откриваат дека Meta е свесна дека ќе се соочи со казни и предвидува можни пенали до 1 милијарда долари — сума која, според нејзини анализи, е незначителна во споредба со приходите. Само од делот на реклами со „поголем правен ризик“, Meta секои шест месеци заработува 3,5 милијарди долари.
Раководството на компанијата, според документите, делува само кога постои непосредна закана од регулаторни мерки, наместо проактивно да ги решава проблемите.
Подлабок проблем
Додека Meta ги брои профитите, вистинските луѓе ги трпат последиците. Во еден случај, профил на регрутерка од Кралското канадско воено воздухопловство бил хакиран, а измамници преку нејзината сметка промовирале крипто-измама. И покрај десетици пријави од неа и нејзините пријатели, на Meta ѝ требало повеќе од еден месецда реагира. До тогаш, еден нејзин поранешен колега веќе изгубил 40.000 канадски долари, мислејќи дека вложува по совет од доверлива пријателка.
Овој случај го нагласува подлабокиот проблем: дури и кога корисниците пријавуваат измами, системот често ги игнорира. Според документ од 2023 година, Meta игнорирала или погрешно одбила до 96% од валидните пријави за измамнички содржини.
