Samsung Galaxy S24 Ultra – Влез во ерата на вештачката интелигенција

Врвна изработка, уште подобри перформанси и камери, седум години безбедносни ажурирања  – Galaxy S24 Ultra претставува сам врв на понудата на паметни телефони на Samsung и воопшто на пазарот на смартфони,  со посебен фокус на функциите за вештачка интелигенција, кои се обединети под името Galaxy AI

Текст и фото: НИКОЛА БУРАГЕВ

Една од големите технолошки теми минатата година беше вештачката интелигенција, а оваа година се почесто ќе гледаме имплементација на AI кај паметните телефони. Samsung со претставувањето на новата Galaxy S24 серија на настанот Unpacked во Сан Хозе ја отвори сезоната на флегшип смартфони за 2024 година и прв понуди функции за вештачка интелигенција во своите најнови флегшип паметни телефони.

Во Galaxy S24 линијата сè уште има три смартфони со различни големини и слични можности, но сега ќе се фокусираме на Galaxy S24 Ultra, кој традиционално го нуди најдоброто што може да го понуди Samsung. Годинашниот уред несомнено има многу што да понуди – помоќен чипсет, посветол дисплеј, подобрена камера, уште посилно куќиште и, се разбира, нови функции за вештачка интелигенција.

Дизајн: Познат, но различен

Samsung продолжува да го оптимизира дизајнерскиот јазик што го воведе во 2022 година со Galaxy S22 Ultra, така што на прв поглед уредот не изгледа многу поразлично од минатогодишниот Galaxy S23 Ultra. Фактот дека дизајнот не е значително променет во однос на неговиот претходник во суштина е позитивна работа, бидејќи Samsung со овој дизајн погоди право во центар. За голем телефон, Galaxy S24 Ultra повторно изгледа фантастично, привлечно и деловно.

Дизајнот е суптилно освежен, но носи подобрувања на првите места, иако ќе има и такви кои нема да се согласат со мене. Samsung сега целосно користи рамен екран, наместо досегашниот заоблен, со потенки рамки од страните, кои конечно се идентични од сите четири страни. Тоа најмногу се забележува во долната рамка на екранот, која е видливо потенка. Задниот дел изгледа речиси исто, но исто така е порамен, а малку посплоснати рабови.

За разлика од претходните модели, рамката сега е изработена од легура на титаниум, поради што уредот е поцврст и поотпорен, но тоа не влијае значително на вкупната тежина -232 грама наспроти 234 грама лани. Текстурата на рамката е матирана и не се задржуваат многу отпечатоци од прсти на неа. Тоа е случај и со задниот панел, кој исто така е матиран, но изработен од стакло. Нашиот уред беше во титаниумска сива боја, а достапни се и уреди со црна титаниум, виолетова титаниум и жолта титаниум боја.

Поставувањето на објективот на главната камера е исто така непроменето, што значи дека добиваме пет прстени со LED блиц меѓу нив. На горната страна има две отвори за микрофони, а доле се поставени слот за две nanoSIM-картички (подржан е и eSIM), USB-C порт, засек за еден звучник и место за S Pen. Копчињата за вклучување и јачина на звук се поставени на десната страна. Уредот повторно поседува IP68 рејтинг за водоотпорност.

Голем и светол дисплеј

Дијагоналата, резолуцијата и брзината на освежување не се променети во однос на минатата година, но сега дисплејот е уште посветол и порамен. Сè уште станува збор за фантастичен 6,8-инчен Samsung AMOLED екран (резолуција 1440 x 3120 пиксели), иако можеби со малку повеќе пригушени бои во споредба со неговиот претходник (Samsung најави софтверска надградба за проблемот). Ова се забележува само во директна споредба со ланскиот Galaxy S23 Ultra. Благодарение на новотѕо Gorilla Glass Armor стаклото, дисплејот е уште подобро заштитен од кршење и гребење, а исто така е и помалку рефлективен и многу почитлив на дневна светлина. Оваа година, максималната осветленост на дисплејот достигнува 2.600 нита, што е значително зголемување во однос на минатата година (1.750 нита), што дополнително ја подобрува видливоста при силна директна светлина.

Дисплејот е одличен и навистина добро функционира во сите услови. Репродуцира слики со живи бои, високи детали, висок контраст и голема осветленост. Компанијата вклучи и адаптивна опција за промена на бојата, која ги користи сензорите за промена на прикажувањето на боите и температурата на боите според условите на околината, со што се постигнува поприродна слика. За возврат, Vision Booster се грижи за зачувување на читливоста на екранот дури и под силна сончева светлина.

Како што веќе потенциравме, оваа година дисплејот е рамен, што ќе ги задоволи сите кои не сакаат заоблени екрани. Ова од една страна ќе го олесни поставувањето на заштитна фолија на екранот, а од друга страна, рамната површина е значително посоодветна за употреба со S Pen, така што ова директно влијае на удобноста при користењето.

Екранот е покриен со новото Corning Gorilla Armor стакло, кое се користи само кај Galaxy S24 Ultra. Според компанијата, тој е четири пати поотпорен на гребење од конкурентските алуминиосиликатни очила. Покрај тоа, Corning Gorilla Armor го намалува отсјајот за 75%, што ја подобрува читливоста и ги намалува рефлексиите во речиси сите услови. Да бидам искрен, ова веднаш го забележав бидејќи во споредба со други телефони, чиј екран се претвора речиси во огледало кога се исклучен, екранот на Galaxy S24 Ultra е целосно црн. Во дисплејот повторно е вграден ултразвучен сензор за отпечатоци, кој работи многу брзо и прецизно. Во неговиот горен дел е сместен и отвор за селфи камерата.

Уредот пристигнува со познатото S Pen пенкало, кое не доби нови функции, но веќе познатиот сет на можности е доволно разновиден. Стајлусот се поврзува со телефонот преку Bluetooth и може да се користи за пишување, цртање, избор на содржини, контрола на функции со гестови во воздухот и многу повеќе. Додатокот се полни кога е вметнат во посебниот отвор во куќиштето на телефонот и повторно е водоотпорен.

Перформанси и батерија

Galaxy S24 Ultra се издвојува и во друг поглед – тој е единствениот модел во серијата што на сите пазари е достапен со чипсетот Snapdragon 8 Gen 3 for Galaxy. За споредба, другите два модели се достапни во Европа, (вклучувајќи ја Македонија) со Exynos 2400 чипот. Snapdragon 8 Gen 3 for Galaxy е верзија на водечкиот мобилен чипсет на Qualcomm што е достапен само за смартфоните на Samsung и доаѓа со зголемена работна фреквенција на моќните јадра во споредба со стандардната верзија. Уредот е достапен со 12 GB RAM и 256, 512 GB и 1 TB простор за складирање податоци.

Нашиот модел е со 512 GB внатрешна меморија и се покажа фантастично брз и респонсивен во сите можни сценарија. Анимациите се мазни и флуидни, мултитаскингот е беспрекорен, лизга низ социјалните мрежи, а немаше игра што не ја покренува мазно и без прегревање. Оваа година, компанијата го подобри и системот за ладење, зголемувајќи го волуменот на комората за испарување за 1,9 пати, што се докажува и во пракса.

Перформансите на новиот процесор се несомнено повисоки. Во Wild Life Extreme, добивме резултат од околу 5.000 поени, во споредба со 3.770 на Snapdragon 8 Gen 2 за Galaxy. Во Geekbench 5, пак, стигнавме до 1.700 поени во еднојадрениот и речиси 6.500 поени во тестот со повеќе јадра, во споредба со 1.500 и 5.000 поени за минатогодишниот чипсет. Во Geekbench 6, резултатите се 2300 и 7000 поени соодветно.

Батеријата е повторно со капацитет 5000 mAh и со поддржано брзо жично полнење од 45 вати (околу 70 проценти полнење за 30 минути со полнач од 45 вати), како и безжично полнење на 15 вати. Не е испуштена и опцијата за обратно безжично полнење на други уреди, кое се одвива на 4,5 вати. Што се однесува до траењето на батеријата, ситуацијата е подобрена во однос на минатогодишниот модел. Galaxy S23 Ultra успеа да понуди импресивно траење на батеријата, а новиот чипсет и помогна на компанијата дополнително да ја оптимизира потрошувачката на енергија. Гарантира одлична целодневна автономија на батеријата за поголем дел од корисниците, а во мојот случај, добивав и повеќе од осум часа вклучен дисплеј пред да треба да посегнам по полнач.

Камери

Ултра моделот од Samsung Galaxy S24 серијата е и смартфон на компанијата со најдобри камери. Така е и оваа година, а во однос на минатогодишниот модел, сепак, носи одредени промени, а тие се донекаде контроверзни.

S24 Ultra ја задржа основната камера од 200 MP, 10 MP 3x телефото и 12 MP ултрашироката, а новитет е 50MP перископ телефото камерата, која сега нуди 5x оптички зум, додека Galaxy S23 Ultra има 10x објектив. Сепак, тоа го надоместуваат новиот сензор и Galaxy AI, кои овозможуваат 10x зум без загуба на квалитетот и до 100x Space Zoom.

Фотографиите со 10x зумирање креирани со Galaxy S24 Ultra генерално се подобри од оние на минатогодишниот модел. Ова е особено видливи во опсегот на зумирање од 5-10x.

Примарната камера од 200 MP повторно успешно ги компресира пикселите и продуцира одлични фотографии и во текот на денот и ноќно време. Исто така, снима импресивни портрети фотографии и одлични видео записи до 8K резолуција. Фотографиите се полни со детали, широк динамичен опсег и убаво изразени бои. Многу е веројатно дека оваа година Samsung повторно ќе има кандидат за камера на годината меѓу паметните телефони.

Дури и ултрашироката камера има автофокус, така што може да се користи и за макро фотографирање. Видеото во 4K резоуција е мазно, полно со детали и импресивно стабилизирано. Од предната страна е истата селфи камера од 12 MP со автофокус, а снима и 4K видео до 60 fps.

One UI 6.1 со Galaxy AI

Смартфонот користи Android 14 со One UI 6.1 интерфејс, што нема да ги изненади корисниците на верзијата 6.0, но сепак има одредени промени. Меѓу нив има повеќе опции за прилагодување на заклучениот екран и Always-On екранот со можност за додавање виџети. Функцијата Nearby Share сега е интегрирана во Quick Share, а компанијата ги отстрани сопствените гестови за навигација и ги оставила оние бграденитево Android. Анимациите на интерфејсот се помазни и тоа се забележува при стартување и минимизирање на апликациите.

Меѓу другите новитети се оние поврзани со вештачката интелигенција, кои се дел од системот Galaxy AI.  За почеток има поддршка за 13 јазици, но имајте предвид дека македонскиот засега не е меѓу нив. Не знаеме дали ова ќе се промени со текот на времето, но засега е така. Секако, достапен е англискиот јазик, кој може да се користи за сите функции на Galaxy AI,.

Во тастатурата на Samsung е додадена опција за преведување пораки во избраните апликации за разговор, а има и додаток за промена на тонот на пораките и проверка на правописот. Друга функција што прв пат ја гледаме кај некој смартфон обезбедува превод на глас и текст во реално време за време на повик. Можете да го поставите така што другата страна може да го слуша преводот изговорен само со машки или женски глас.

Најистакнатата Galaxy AI функција сепак е Circle to Search, која е развиена во соработка со Google. Во пракса работи како Google Lens, но со активира со долго притискање на копчето Home или индикаторот на дното на екранот при користење гестови. Потоа можете да го заокружите саканиот објект, а системот ќе ви прикаже резултати од Google. Резултатите се исти со оние што се добиваат со Google Lens. На пример, кога ќе видите некои чевли на екранот, не морате ни да ги сликата, само заокружете ги со прстот или S Pen и ќе се појават резултати за чевлите.

Меѓу функциите има и преведувач за разговори лице во лице, што обезбедува аудио и текст и работи слично на Google Translate, но со ограничена јазична поддршка. Снимачот на глас може да создаде транскрипции на снимки со идентификација на различни говорници, а потоа да го преведе текстот или да го сумира – ова исто така функционира добро, но често имаше и грешки во разбирањето на некои зборови во интервјуто што го тестиравме.

Друга интересна функција со практична вредност е можноста за креирање забавено видео во галеријата или Instant Slow-mo. Ова функционира многу лесно бидејќи само треба да го држите прстот на избраниот клип и системот веднаш ќе создаде AI рамки со вештачка интелигенција за да ја забави сликата и да обезбеди флуидно движење. Ова се случува речиси веднаш, а по кревањето на прстот, репродукцијата продолжува со нормална брзина.

Во галеријата има и други функции за вештачка интелигенција. Edit Suggestion , на пример, предлага различни корекции како што се отстранување на сенките или рефлексиите од снимените фотографии, менување на заматување на заднината во портретите или нивно преправање со подобрени детали и бои. Функцијата може дури и да создаде кратко видео од фотографија со музика во позадина што симулира убедлив 24-часовен тајмлепс.

За возврат, Generative Edit може да пополни делови од позадината со генерирана содржина – на пример, може да се пополнуваат празни места или да се преместуваат и бришат објекти од кадарот. Меѓутоа, можат лесно да се видат генерирани делови наместо избришаните објекти, бидејќи се благо заматени и со послаб квалитет од остатокот на фотографијата. Понекогаш алгоритмите не можат да се справат со навидум едноставни задачи, а при бришење на предмети на фотографиите се појавуваат чудни артефакти.

Финални впечатоци

Galaxy S24 Ultra претставува сам врв на понудата на паметни телефони на Samsung, а воопшто и на пазарот на смартфони. Се работи за комплетен телефон, кој поседува се што мора да има еден врвен флегшип модел. Уредот доаѓа со оптимизиран дизајн, рамка од легура на титаниум и уште посветол, а сега и рамен дисплеј кој е заштитен со посилно Corning Gorilla Armor стакло, кое исто така изненадувачки добро се справува со отсјајот.